Á vefsíðu Alcoa á Íslandi birtist nýlega þessi frétt um einstaka góðvild fyrirtækisins. M.a. segir:

Þekkingarsetrið á Egilsstöðum ehf. hefur fengið 10 milljón króna styrk frá Alcoa Foundation til að undirbúa meistaranám á sviði umhverfis- og þjóðgarðastjórnunar.

Þekkingarsetrið á Egilsstöðum ehf. mun beita sér fyrir því að staðbundið háskólanám á Austurlandi hefjist árið 2009. Námið verður á sviði umhverfis- og þjóðgarðastjórnunar. Markmiðið er að kennsla fari fram á Austurlandi og byggi á sérstæðu náttúru Austurlands og auðveldu aðgengi að jöklum, öræfum, eldgosasvæðum og skóglendi. Einnig verður Vatnajökulsþjóðgarður vettvangur rannsókna á sviði stjórnunar og náttúru.

Áhugavert ekki satt?

Námið verður byggt á sérstæðri náttúru Austurlands (úbbs… er sandur og möl eitthvað sérstætt?) og þá líklega einblínt á hvernig auðveldast er að drekkja stóru svæði af henni án þess að lenda í nokkurri mótspyrnu. Einnig verður lögð áhersla að hvernig hægt er að eyðileggja híbýli örfárra hreindýra, refa og fugla sem eru hvort sem er ekki menn og skipta því ekki máli og svo geta gæsirnar bara flogið til Grænlands. Líklegast verður eitthvað farið út í hvernig má láta ljóta fossa og asnaleg græn svæði hverfa (þó auðvitað sé ekkert svoleiðis þarna fyrir austan).

Mest áhersla verður samt auðvitað lögð á hvernig hægt er að snúa út úr þessu öllu saman, reisa íþróttahallir, halda stórtónleika og láta fólk sleikja á sér rassgatið.

Þetta er nám sem enginn ætti að láta framhjá sér fara.