Þetta er svo fallegt; hópur fólks sem kennir sig við ÍSLAND og stendur að hópnum Indefence flaug til stóru brittaníu seinasta þriðjudag og afhenti mótmælaskjal við breska þinghúsið sem innihélt 83.300 nöfn Íslendinga sem mótmæla því að hafa verið skilgreindir sem hryðjuverkamenn með hryðjuverkalögum breta.

Á mynd af athöfn hópsins má meðal annars sjá Sigmund Davíð Gunnlaugsson, formann Framsóknarflokksins, Orra Pál Dýrason, trommara Sigur Rósar og Íslensku fjallkonuna.

Á sínum tíma gagnrýndum við á Aftöku þetta framtak vegna boðskaparins sem skein í gegnum ljósmyndirnar sem þau birtu og sýndu fólk halda á spjöldum  með áletrað t.d. “Mr. Brown, do we look like terrorists?”, “not my fault”, “I’m not a terrorist”, “Gordon darling, we are not to blame” o.s.frv.

Aðal gagnrýni okkar þá snéri að þeirri hugmynd hópsins að hryðjuverkamaður líti einhvern veginn visst út. Og við spurðum þá HVERNIG LÍTUR HRYÐJUVERKAMAÐUR ÚT?

Samkvæmt myndunum sem birtust á Indefence líta þeir allavega ekki út eins og víkingar norðursins.

Því það er fólkið í Afganistan, Írak, Palestínu og á miklu fleiri stöðum sem hefur verið og er stimplað terroristar sökum þess að þau búa á svæðum sem ekki eru í náðinni eða hafa náttúruauðlindir sem aðrir ásælast. Flest fólk styður ekki morð á saklausum íbúum landa, t.d. á börnum og konum en finnst frekar í lagi að uppreisnarmenn séu drepnir. Samt eru allir uppreisnarmenn feður, mæður, systur, bræður, frænkur, frændur og vinir ,,saklausu” íbúanna og eru oft að berjast gegn innrásunum, berjast fyrir frelsi ,,saklausu” íbúanna.

Þeir sem eru á móti fjöldamorðum á ,,saklausum” íbúum en styðja eða fordæma ekki morð á uppreisnarmönnum eru í raun á móti upprisu fólks og rétti hvers mans að verjast og berjast gegn yfirgangi annara eins og t.d. herskáir Palestínumenn gera. Þar af leiðandi eru þeir sem styðja eða fordæma ekki morð á uppreisnarmönnum að lýsa yfir stuðningi sínum við ofbeldið og valdníðsluna sem framin er á fólkinu.

Gangrýni okkar á Indefence-uppátækið núna er á trú þessa fólks á réttmæti lagasetningana yfir höfuð; lagasetninga sem stimpla heilu löndin og samfélögin sem terrorista. Þessi samtök minnast ekki einu orði á óréttlætið og viðbjóðinn sem kerfisbundin mismunun felur í sér, ekki orði á kapítalisma eða á misskiptingu auðs. Nei, það sem þau gera er að klæða sig upp eins og skítablesarnir sem stimpluðu landann, draga fjallkonudraslið úr skrifstofustarfinu og sameinast um málstaðinn í nafni þjórembu og plebbisma.

Við hjá Aftöku erum glöð í hópi hinna 200.000 hræðnanna á þessu skeri sem finnst nánast allt mikilvægara en að dressa sig upp fyrir valdníðslubákn í Bretlandi til að fá tilbúna ímynd lands til baka svo að þetta sama lið geti grætt á  Íslandi sem vörumerki.