Hvetur til vopnahlés í öllum heiminum

Antonio Guterres, aðalframkvæmdastjóri Sameinuðu þjóðanna.
Antonio Guterres, aðalframkvæmdastjóri Sameinuðu þjóðanna. AFP

António Guterres, aðalframkvæmdastjóri  Sameinuðu þjóðanna, hvatti til vopnahlés um víða veröld í ávarpi sem hann flutti síðdegis. 

Guterres sagði aðeins einn sameiginlegan óvin til staðar þessa stundina, það er kórónuveirunnar og útbreiðslu hennar. Á sama tíma geisa styrjaldir þar sem konur og börn, fatlað fólk, fólk á jaðri samfélagsins og uppflosnað fólk verður harðast úti. Hann benti á þessir sömu hópar eru hvað viðkvæmastir gagnvart veirunni og hvatti hann til tafarlauss vopnahlés um víða veröld. 

Hér má lesa ávarp Guterres í heild sinni í íslenskri þýðingu.

Ákall um vopnahlé í heiminum

Heimur okkar stendur andspænis sameiginlegum óvini: COVID-19.

Veiran kærir sig kollótta um þjóðerni, kynþátt, flokk eða trú. Hún ræðst án afláts jafnt á alla.

Á sama tíma geisa styrjaldir um allan heim. 

Þeir sem síst skyldi verða harðast úti; konur og börn, fatlað fólk, fólk á jaðri samfélagsins og uppflosnað fólk.

Mestu líkur eru á að þessir sömu hópar líði fyrir COVID-19. 

Gleymum því ekki að heilbrigðiskerfi hafa hrunið í stríðshrjáðum löndum. 

Alltof fáliðaðar heilbrigðisstéttir hafa oft og tíðum verið skotmörk. 

Flóttamenn og annað uppflosnað fólk af völdum ofbeldis og átaka eru enn berskjaldaðri en ella. 

Ofsi veirunnar minnir okkur á vitfirringu stríðs. 

Af þessum sökum hvet ég til tafarlauss vopnahlés um víða veröld.   

Það er kominn tími til að stöðva vopnuð átök og beina sjónum okkar að hinni sönnu orrustu lífs okkar. 

Stríðandi fylkingum segi ég:   

Slíðrið sverðin.

Setjið til hliðar vantraust og fjandskap.

Látið byssurnar þagna, stöðvið stórskotaliðið, látið af loftárásum.

Þetta er þýðingarmikið…

Til þess að skapa svigrúm til að koma hjálpargögnum sem bjarga mannslífum til skila.

Til að skapa svigrúm fyrir diplómatískar lausnir.

Til að vekja von á þeim stöðum sem eru hvað berskjaldaðastir fyrir COVID-19.

Við getum sótt innblásturs til bandalaga og viðræðna sem hægt og bítandi eru að hefjast á milli andstæðinga til þess að greiða fyrir sameiginlegum viðbrögðum við COVID-19. En við þurfum miklu meira.

Bindum enda sjúkleg stríðsátök og berjumst við sjúkdóminn sem herjar á heiminn.

Byrjum á því að stöðva bardaga hvarvetna. Nú þegar.

Þetta er það sem fjölskylda mannkyns þarf á að halda, nú meir en nokkru sinni fyrr.

mbl.is

Bloggað um fréttina

Kórónuveiran

31. mars 2020 kl. 13:07
1135
hafa
smitast
173
hafa
náð sér
36
liggja á
spítala
2
eru
látnir