Gönguátak til heiðurs heilbrigðisstarfsfólki

Gönguátakið er til heiðurs heilbrigðisstarfsfólki sem stendur nú í ströngu.
Gönguátakið er til heiðurs heilbrigðisstarfsfólki sem stendur nú í ströngu. Ljósmynd/Ferðafélag Íslands

Ferðafélag Íslands hefur hleypt af stokkunum nýju átaki undir yfirskriftinni Almannavarnagöngur Ferðafélags Íslands sem gengur út á að hvetja fólk til að fara í gönguferðir í nærumhverfi sínu, kanna nýjar gönguleiðir eða slóða í hverfinu, segja vini frá göngunni og hvetja hann til nýrrar upplifunar.

Gönguferðirnar í þessu verkefni eiga að vera frá heimili hvers þátttakanda þar sem gengið er í nærumhverfinu, allar götur og gönguleiðir í nærumhverfinu þræddar, gengið á hvern hól og hæð og um leiðir sem viðkomandi hefur ekki gengið áður í nærumhverfinu og/eða gönguleiðir sem viðkomandi kann og þekkir. Gengið er með maka eða fjölskyldumeðlimum eða einn eftir atvikum. Fyrir, eftir eða meðan á göngunni stendur skal hringt í vin og sagt frá gönguferðinni og viðkomandi hvattur til að fara út að ganga.

Þá skal taka mynd í gönguferðinni og birta á Instagram undir myllumerkinu #ferðafelagislands eða senda þær á [email protected]. Myndirnar birtast á samfélagsmiðlum Ferðafélagsins og eftir fjórar vikur verður dregið úr hópi þátttakenda sem hafa sent myndir. Fimm heppnir hljóta glæsilega ferðavinninga frá Ferðafélagi Íslands.

Almannavarnagöngur Ferðafélagsins eru gengnar til heiðurs starfsfólki í heilbrigðisþjónustunni sem vinnur einstakt starf undir miklu álagi við þær aðstæður sem nú eru uppi og eins til heiðurs almannavarnanefnd og þeim hópi fólks sem leiðir nú leiðangurinn upp brekkuna sem samfélagið er að klífa.

Eins eiga almannavarnagöngur FÍ að minna fólk stöðugt á að við erum öll almannavarnir og fylgjum reglum um fjarlægð í samskiptum og notum bros og hlýju í stað handabands eða faðmlags og munum eftir öllum reglum um hreinlæti.

„Við þær aðstæður sem nú eru uppi er mikilvægt að huga vel að heilsunni, þar með talið að sofa vel, borða hollan og góðan mat, brosa, hlæja og hafa gaman og góð gönguferð úti í náttúrunni í fárra vina hópi er án efa eitt það allra besta sem hægt að gera,“ segir í tilkynningu frá Ferðafélagi Íslands.

mbl.is

Stöndum saman

Við hjá Árvakri viljum vekja athygli á því sem vel er gert á þessum erfiðu tímum. Ef þú ert með góða sögu af fyrirtækjum og einstaklingum sem eru að gera gott, sendu okkur ábendingu á netfangið [email protected].

Stöndum saman