50 börn hafa sótt um vernd

AFP

Fimmtíu börn sóttu um alþjóðlega vernd á Íslandi á fyrsta ársfjórðungi. Af þeim voru fimm fylgdarlausir drengir. Alls fengu 28 börn vernd á Íslandi á tímabilinu en 11 hefur verið synjað. 23 börn hafa heldur ekki fengið vernd hér þar sem þau hafa ýmist verið endursend á grundvelli Dyflinnarreglugerðarinnar, fengið vernd í öðru landi eða máli þeirra lokið á annan hátt, samkvæmt vef Útleningastofnunar. Alls voru afgreidd mál 63 barna á flótta hjá Útlendingastofnun á fyrsta ársfjórðungi.

AFP

Þeir drengir sem hingað komu án þess að vera í fylgd fullorðinna koma frá fjórum ríkjum: Sómalíu, Afganistan, Síerra Leóne og Gana. 

12 börn flutt frá Grikklandi til Lúxemborgar

UNICEF, IOM (The International Organization for Migration) og Flóttamannastofnun Sameinuðu þjóðanna (UNHCR) lýsa yfir ánægju með að í gær tókst að koma tólf fylgdarlausum börnum í hælisleit fyrir í Lúxemborg þar sem tekið var vel á móti þeim síðdegis í gær. Börnin höfðu öll búið í yfirfullum móttökumiðstöðvum fyrir flóttafólk og hælisleitendur á grísku eyjunum Lesbos, Samos og Chios í marga mánuði. Þjóðverjar vinna nú að því að taka á móti öðrum hópi fylgdarlausra barna frá Grikklandi og standa vonir til að það verði nú um helgina.

„Móttaka Lúxemborgar er sú fyrsta af vonandi mörgum að frumkvæði Evrópusambandsins í aðgerðum sem miða að því að koma 1.600 fylgdarlausum börnum í Grikklandi fyrir á betri stað. Tíu aðildarríki ESB auk Sviss hafa skuldbundið sig til að taka á móti börnunum,“ segir á vef UNICEF á Íslandi.

Þessar þrjár stofnanir Sameinuðu þjóðanna, UNICEF, IOM og UNHCR, segjast í sameiginlegri yfirlýsingu fagna þessum jákvæðu fyrstu skrefum í átt að því að bjarga þessum viðkvæma hópi barna frá slæmum aðstæðum í flóttamannabúðum og móttökumiðstöðvum í Grikklandi á komandi vikum. Stofnanirnar fagna því einnig að aðgerðirnar nú í Grikklandi, Lúxemborg og Þýskalandi taki meðal annars mið af því sem er börnunum fyrir bestu í þessu tilfelli, segir á vef UNICEF.

„Þetta framtak nú er ekki síst mikilvægt í ljósi aðstæðna vegna heimsfaraldurs COVID-19. Að flytja börnin á þessum erfiðu tímum sendir sterk skilaboð um evrópska samstöðu og við vonumst til að sjá meira af þessu,“ segir Ola Henrikson, svæðisstjóri IOM gagnvart EES, ESB og NATO, í frétt á vef UNICEF á Íslandi.

Börnin sem flutt voru í gær, ein stúlka og ellefu drengir, tvö frá Sýrlandi og tíu frá Afganistan, eru á aldrinum 11 til 15 ára.

„Tólf börn sjá í dag fram á bjartari framtíð í nýju landi,“ segir Philippe Leclerc, fulltrúi Flóttamannastofnunar SÞ í Grikklandi í tilkynningu stofnananna. „UNHCR hefur unnið náið með Grikkjum, Evrópsku stuðningsskrifstofunni í hælismálefnum (EASO) og frjálsum félagasamtökum við að tryggja að bestu hagsmunir barnanna séu tryggðir. Evrópuþjóðir verða að vinna saman og deila ábyrgðinni og byrðunum með Grikklandi til að tryggja að öll fylgdarlaus börn fái þá umönnun og öryggi sem þau eiga rétt á.“

Áður en lagt var af stað í gær fengu börnin öll læknisskoðun og voru prófuð fyrir COVID-19. Reyndust þau öll smitlaus.

Vonast til þess að önnur Evrópuríki taki þátt

Í átaki ESB er lögð áhersla á að tekið verði af ábyrgð á móti börnunum og þau ekki hýst í stórum skýlum eða miðstöðvum. Heldur fái þau strax stuðning og öryggi og skjótan aðgang að heilbrigðisþjónustu, félags- og sálfræðiþjónustu sem og menntun og annarri mikilvægri grunnþjónustu.

„Ég vona að þessar vel heppnuðu aðgerðir nú hvetji önnur Evrópulönd til að fylgja í kjölfarið og flýta sambærilegum aðgerðum hjá sér,“ segir Afshan Khan, yfirmaður UNICEF í Evrópu, Mið-Asíu og samhæfingarstjóri í málefnum flóttamanna og hælisleitenda í Evrópu. „Þetta framtak er mikilvægt því börnin sem hér um ræðir tilheyra viðkvæmasta hópnum og eru í mestri þörf á vernd.“

Í byrjun þessa mánaðar voru skráð 5.200 fylgdarlaus börn og börn sem aðskilin höfðu verið frá fjölskyldu sinni í Grikklandi. Öll þeirra þurfa skjóta lausn sinna mála, forgangsskráningu, sameiningu við fjölskyldu sína og að vera komið fyrir á öðrum stað.

„Meðal þeirra eru 1.600 talin í sérstakri hættu á meðal annars misnotkun, ofbeldi og í sérlega slæmri stöðu í yfirfullum móttökumiðstöðvum á grísku eyjunum. Stuðningur Evrópusambandsins og aðildarríkja er algjörlega nauðsynlegur til að tryggja vernd þessara barna í Grikklandi sem og heilsu og velferð þeirra til lengri tíma í gegnum úrræði eins og þessi,“ segir á vef UNICEF á Íslandi.

Flóttafólk frá Venesúela.
Flóttafólk frá Venesúela. AFP

Flestir sem sækja um á Íslandi koma frá Venesúela

Alls voru teknar fyrir umsóknir 258 einstaklinga um alþjóðlega vernd á fyrstu þremur mánuðum ársins. Af þeim fengu 128 alþjóðlega vernd hér en 45 var synjað. 23 voru endursendir á grundvelli Dyflinnarreglugerðarinnar, 34 fengu vernd í öðru landi og málum 28 lauk á annan hátt, samkvæmt tölfræði Útlendingastofnunar. Flestir þeirra sem hafa fengið hæli koma frá Venesúela eða 75 og hefur enginn þeirra fengið synjun sem sótt hafa um alþjóðlega vernd hér frá Venesúela. Næstflestar umsóknir koma frá Sómalíu, 15, og Írak, 10.

Í mars fengu 39 vernd á Íslandi en 16 var synjað. 5 voru endursendir á grundvelli Dyflinnarreglugerðarinnar, 11 fengu vernd í öðru ríki og málum 10 lyktaði á annan hátt að því er fram kemur á vef Útlendingastofnunar

mbl.is