Ríkiskaup leiðrétta meintar rangfærslur

mbl.is/Þorgeir

Umfjöllun fjölmiðla í dag um kæru á hendur Ríkiskaupum vegna nýafstaðins útboðs um kynningarherferðina „Ísland saman í sókn“ (e. Destination Iceland) felur í sér rangfærslur sem stofnunin telur ástæðu til að leiðrétta.

Þannig hefst tilkynning Ríkiskaupa í kvöld en aug­lýs­inga­stof­an Pip­ar/​TBWA hef­ur kært Rík­is­kaup til kær­u­nefnd­ar útboðsmá­la vegna þeirr­ar ákvörðunar að ganga að til­boði bresku aug­lýs­inga­stof­unn­ar M&C Sa­atchi í verk­efn­inu „Ísland – sam­an í sókn“.

Í tilkynningunni kemur fram að margt sem komið hafi fram í fjölmiðlum í dag sé ekki samkvæmt sannleikanum.

Meðal þess sem er enn haldið á loft er meint mismunun vegna virðisaukaskattsmála og meint brot hlutskarpasta bjóðanda og vanhöld á rannsóknarskyldu Ríkiskaupa. Þá hafa viðmælendur vegið alvarlega að heiðri dómnefndar með efasemdum um val í nefndina, heilindi hennar og skort á upplýsingum um bjóðendur fyrir matið á faglegum hluta útboðsins. Eins og Ríkiskaup hafa útskýrt í fjölmiðlum og upplýst er með dæmum á vef fjármála- og efnahagsráðuneytis er virðisaukaskattur hlutlaus og hefur ekki áhrif á verðmyndum í útboðum hvort sem hún er keypt innan- eða utanlands. Staðhæfingar um annað eru byggðar á misskilningi,“ segir í tilkynningunni.

Gagnrýnt hafi verið að tilboð alþjóðlegu auglýsingastofunnar M&C Saatchi, sem er í samstarfi við íslenskt fyrirtæki, hafi orðið fyrir valinu vegna frétta um meint bókhaldsbrot fyrirtækisins. Ríkiskaup benda á að tilboð í útboðinu sé valið út frá fyrirframgefnum valforsendum og hæfiskröfum sem fram komi í útboðsgögnum og séu í samræmi við íslensk lög. 

Þá er í viðtali við fjölmiðla vegið að heiðri dómnefndarinnar með ásökunum um tengsl ónefnds nefndarmanns við M&C Saatchi. Er gefið í skyn að hann hafi þess vegna gefið fyrirtæki viðmælanda lægri einkunn sem hafi ráði úrslitum um endanlegt val. Þessi staðhæfing er algjörlega tilhæfulaus. Þá hefur nefndur viðmælandi haldið því fram að ef dómnefndin hefði vitað af fyrrnefndri fjölmiðlaumfjöllun um meint brot M&C Saatchi hefði það haft áhrif á einkunnagjöf nefndarinnar. Hlutverk hennar var eingöngu að leggja faglegt mat á kynningar bjóðenda á grundvelli fyrirliggjandi valforsenda. Óheimilt er með öllu að víkja frá því. Slíkt hefði brotið gegn fjölmörgum meginreglum laga um opinber innkaup,“ segir enn fremur í tilkynningunni.

Hlutverk Ríkiskaupa sé að gæta þess að opinberir kaupendur fylgi ákvæðum laga um opinber innkaup og þeim kröfum sem settar séu fram í útboðsgögnum hverju sinni. 

Markmið laganna er að tryggja jafnræði fyrirtækja og stuðla að hagkvæmni í opinberum rekstri með virkri samkeppni. Í þessu útboði var öllum þessum markmiðum fylgt. Óánægðir bjóðendur hafa vettvang hjá kærunefnd útboðsmála til að fá úr því skorið hvort þeir hafi verið beittir ranglæti eða ekki.

Tilkynninguna má lesa í heild sinni hér.

mbl.is