Páll Óskar með Pallaball á laugardaginn

Páll Óskar verður með Pallaball í beinni á K100 á …
Páll Óskar verður með Pallaball í beinni á K100 á laugardagskvöld.

Páll Óskar hertekur stúdíó K100 í samkomubanninu og færir landsmönnum alvöru Pallaball heim í stofu. Frábær partý-tónlist, skrítin tónlist og svo auðvitað lögin hans Palla saman í einum graut. Siggi Gunnars verður Palla til halds og trausts í stúdíóinu.

Eins og beljur að vori

„Ég get lofað því að þegar þetta er komið og yfirstaðið þá eigum við eftir að hlaupa út eins og beljur að vori. Við eigum öll eftir að taka beljudansinn. En þangað til verðum við að vera skapandi og spá í því hvað við getum gert á meðan. Þetta Pallaball í beinni er eitthvað sem ég get gert á meðan,“ sagði Páll Óskar í samtali við K100.is. Segist Páll ætla að „dressa sig upp“ nákvæmlega eins og hann sé að fara á ball.

„Ég ætla bara að hafa gaman í stúdíóinu og ætla að spila laugardagslög sem koma mér í gírinn. Ég passa upp á það að hlustendur séu að fara að heyra tónlist sem þeir venjulega heyra aldrei í útvarpi. Það er aðalpælingin,“ sagði hann.

Spilar „fríkuð“ lög

„Ég er að fara að spila lög sem eru spiluð meira á djamminu en í útvarpi. Lög sem eru kannski svolítið „út úr kortinu“ og „fríkuð“. Sjaldheyrt „stöff“ sem ég gref úr mínu einkasafni,“ bætti hann við.

„Þetta getur verið mjög skemmtilegt. Þú ert að fara að fá stemningu sem þú færð ekki á hverjum degi í útvarpi.“

Fjörið hefst næstkomandi laugardag, kl 21:30, í beinni útsendingu í útvarpinu, sjónvarpinu og á netinu. Horfðu eða hlustaðu og fáðu Pallaballið beint heim í stofu. Hlustendur geta verið í beinu sambandi í síma 571-1111.
mbl.is
Í loftinu núna
Endalaus tónlist