Laddi setti tvö skilyrði fyrir samstarfinu

Hinn eini sanni Laddi eða Þórhallur Sigurðsson hér í gervi …
Hinn eini sanni Laddi eða Þórhallur Sigurðsson hér í gervi Hallgríms hvítlaukskokks.

Einn áhugaverðasti hamborgari sögunnar lítur nú dagsins ljós en hann er sérhannaður af hinum eina sanna Ladda og eiginkonu hans, Sigríði Rut Thorarensen.

Að sögn Jóhannesar Ásbjörnssonar, talsmanns Gleiðipinna, hefur ríkt mikil tilhlökkun vegna samstarfsins. „Laddi er þjóðareign. Hann er goðsögn, grínari, gleðigjafi og gullbarki og við erum himinlifandi með samstarfið og þakklát fyrir Ladda sem hefur gefið okkur svo ótrúlega mikið.“

Hamborgarauppskriftin kemur frá Ladda sjálfum og uppskriftin að sósunni er frá eiginkonu hans, Sigríði Rut Thorarensen.

„Þetta er afar einfaldur hamborgari í raun, en ofsalega bragðgóður. Í mínum huga þarf góður hamborgari að hafa nóg af beikoni og bræddum osti og svona ekta gamaldags hamborgarasósu. Sigga Rut mín hefur alltaf séð um sósuna,“ segir Laddi. 

Elskar súrar gúrkur og kartöflusalat

Þó að hamborgarinn sé einfaldur setti Laddi þó tvö skilyrði fyrir samstarfinu. „Ég elska súrar gúrkur. Ég kaupi þær alltaf í Ikea og borða þær með flestu. Fer í gegnum heila krukku á viku,“ segir Laddi sem fékk að sjálfsögðu ósk sína uppfyllta og er Laddinn borinn fram með vænum skammti af súrum gúrkum. Seinna skilyrðið var að hann yrði borinn fram með kartöflusalati en ekki frönskum kartöflum. „Okkur fannst það frábær hugmynd. Við höfum aldrei verið með kartöflusalat á Fabrikkunni og fengum Eyþór Rúnarsson meistarakokk til að setja saman besta kartöflusalat í heimi,“ segir Jóhannes.

„Vinir Ladda“ smökkuðu hamborgarann

Þegar vinir Ladda heyrðu af þessu samstarfi vildu nokkrir þeirra ólmir fá að bragða borgarann. Þeir Eiríkur Fjalar, Magnús bóndi, Hallgrímur hvítlaukskokkur og Jarmundur frá Efra-Geldklofi mættu á Fabrikkuna en viðbrögðin voru misjöfn. „Þeir fíluðu hann ekkert alltof vel. Ég bjóst svosem alveg við því, þeir eru allir mjög sérstakir og hafa miklar sérþarfir þegar kemur að mat,“ segir Laddi. Myndavélarnar voru á lofti þegar þessar hvunndagshetjur mættu í smakk og má sjá afraksturinn með því að smella á hlekkinn hér að neðan, sjón er sögu ríkari.






Hinn sívinsælil Laddi.
Hinn sívinsælil Laddi. mbl.is/Golli
mbl.is